Тәлкекке түскен тағдырлар
Сынаққа салып сан жылдар,
Тәлкекке түскен тағдырлар.
Басына түскен бейнеті
Жадына түссе... қан жылар.
Құт, бақыт ұрлар, бақ ұрлар,
Жалғанда мынау бар қулар.
Жазмыштан болды деп ойлар,
Тәлкекке түскен тағдырлар.
Жазғырма Хақты ол үшін,
Тіршілік жолы толы сын.
Адамдар сонша қатыгез,
Қайтеді берсе қол ұшын.
Сыпырып көрсең терісін,
Таныр ең езін, серісін.
Киіп ап пенде маскасын,
Иектер кейде пері, жын.
Ақ, адал жолдан тайдырар,
Талықсып көктен ай құлар.
Айдында жүзсе қос аққу,
Сыңарынан қайтсе айырар.
Жолдар да кейде қиыспай,
Қос ғашық кетті ұйыспай.
Әр торап тартып әр жаққа,
Әкеткен алыс қиястай.
Табаннан өтіп сан ызғар,
Қалтырап дене, жан сыздар.
Сорлатып, сорын қайнатқан,
Алдаған арбап арсыздар.
Көктайғақ таныс, жаңбыр, қар,
Қара бұлт көрсе жабырқар.
Екі-үш күн ашық күн болса,
Қуанып сонша таңырқар.
Жылаумен өткен сан жылдар,
Оларда хал жоқ қалжыңдар.
Гөй-гөйге басса әредік,
Туындар шерлі ән-жырлар.
Ғаламда мынау сан сыр бар,
Қараңғы түнек, ақ нұр бар.
Жұмақтың шалқыр төрінде,
Тәлкекке түскен тағдырлар.