Алаң да алаң, алаң жұрт
Алаң да алаң, алаң жұрт,
Аспанын торлап қара бұлт,
Шапаннан басқа түгі жоқ,
Жосылды жұртым жалаңбұт.
Қырғыздан киді дамбалды,
Ресейден киді сандалды.
Қарызға батты белшеден, –
Еуропа, АҚШ таң қалды.
Көлікті алды шет елден,
Б/у деген затқа ет өлген.
Тұрмыстық бүкіл техника,
Жасалып келген бөтеннен.
Күні жоқ әсте құтайған,
Етікті киді Қытайдан.
Майтабан болып ұл-қызы,
Күй кешті бастан пүшайман.
Кеңестен қалған ғұрыппен,
Томпаңдар бөтен тұлыппен.
Бүріккен әтір Польшадан,
Костюмді киді түріктен.
Бәсеке қайда, ел қайда,
Саудаға түскен жер қайда?!
Күніміз қараң болды деп,
Ойбайла мейлің, айғайла!..
Жоқ болса тауар ұсынар,
Біздерде кімнің ісі бар?
Заты жоқ сатар біз түгіл,
Аларман тіпті қысылар.
Елестеп елу ел легі,
Айтылды талай ертегі.
Мазақ қып бізді қорлады,
Бораттай британ тентегі.
Әрине оған мол себеп,
Сөйледік бөсіп, қол сермеп.
Есі бар ел-жұрт одаққа,
Ұмтылмас біздей өзеуреп.