Ақын өлеңдері жинағы ✍️

Майданға түсер қара мен ақ,
Маңдайға бітер сор мен бақ.
Жауға бірдей бейқам мен сақ,
Дауға дүрдей тіл мен жақ.
Денесін табар сызат пен дақ,
Енесін іздер қозы мен лақ.
Билікті аңсар тақым мен тақ,
Шындықты көксер долбар мен нақ.
Қайсысы күйреп, қайсысы жеңбек,
Қайсысы гүлдеп, қайсысы сембек?
Қайсысы бұрыс, қайсысы дұрыс,
Кімдікі жүріс, кімдікі тұрыс?
Өмірің – шақ та, өнерің – ұзақ,
Фәнилік қалып, Бақилық аңсап,
Менің тұлпарым жүрсін деп жан сап,
Жағаласады Жалған мен Хақ.
Жөнге сап тегіс, бәрін реттейтін,
Жамап, жалғайтын тұсын жетпейтін.
Олқысы болса ептеп, септейтін,
Ешбір пендені әзір сөкпейтін;
Қауіп-қатер, індет әкеп қинайтын,
Отқа да сап, суға да сап сынайтын,
Ақ-қарасын барлық ісіңнің
Безбенге салып таразылайтын
Он сегіз мың ғалам иесі – бір АЛЛАҺ!