Ақын өлеңдері жинағы ✍️

Жасампаздың мегамәні – Жаратқан,
Шарапатын бар ғаламға таратқан.
Жаратудан асқан іс жоқ жалғанда,
Жауһар тарту – арайлы таң әр атқан!
Жасаушының макромәні – Жасампаз,
Тарлан талант танымпаз да талғампаз.
Сұлулықты қолдан жасау – керемет,
Жан баурайды ғажап сурет, әсем саз.
Жасаушының микромәні – талапкер,
Тырнақалды шығармасын қарап көр.
Талаптысы – өрде озған өнерпаз,
Талапсызы болар босқа арам тер.
Әсемпаз боп келер әсте бар адам,
Өнерліге қошеметпен қараған.
Жасампаз да, өнерпаз да задында
Жаратқанның бір ісіне жараған.