Ақын өлеңдері жинағы ✍️

Аяқтайын енді мен толғауымды,
Оңай емес қуанту мол қауымды.
Ілескім бар жылдамдық ғасырына,
Жек көремін немкетті марғау үнді…
Күннен күнге кеңейіп қиял көгі,
Тасқын-шабыт іздейді құяр көлін.
«Салют-4» пен Төртінші домнаның
Дастан еттім космостық диалогін…
Құрыш кенті – мекені жүректі ердің,
Алау пештің тұтатқан өрттей демін.
Лапылдаған от-жалын ордасын мен
Ұстаханасы деп білем Прометейдің.
Түлектерің жас толқын лектерінде,
Жасампаздық еңбектің шептерінде.
Елбасы да, Тоқтардай ғарышкер де
Құрышкердің шыңдалған мектебінде!