Ақын өлеңдері жинағы ✍️

Ау, пенделерiм,
беймаза әпенделерiм,
ширақ сендердiң бар осы менде нелерiң ?
Бақшам жоқ менiң,
жоқ менiң автокөлiгiм,
жұлдызды көктен ешкiмге әпер демедiм.
Сендерге бердiм,
ала ғой, мә, мансабыңды,
қалдырсаң болды
қолымда қаламсабымды.
Мен – еркiн құспын,
тәрк етiп балақбауыңды,
Бақиға ұшып кетейiн, Ғалам сағынды.
Менi өздерiңмен фәниге алып қалмаңдар,
жарық жалғанда жайғассын жалықпағандар.
Мәңгiлiгiме бөгетсiз жiберiңдершi,
торыққан жандар алдағын анық бағамдар.