Ақын өлеңдері жинағы ✍️

Күндіз күлкісіз қалдым-ау,
Түнде ұйқысыз қалдым-ау.
…Мазасыз ойдың салмағы…
(Сен − Өлеңімнің ертеңі,
Сен − Өмірімнің желкені).
Оп-оңай ғана мен сені,
Ұмытам деп ем.
Болмады…
Елесің сенің жадымда,
Келеміз бірге адымдап.
…Тағдырдың тарам жолдары
(Жауапсыз сезім − келте бақ).
Қызғаныш оты өртеп ап,
Оп-оңай ғана ертең-ақ,
Жоғалтам деп ем.
Болмады...
Бір Өзің ғана сүйініш,
Бір Өзің ғана күйініш,
…Жазмыштың жазуы сол-дағы…
Өлтірмес сірә, өгей-мұң,
Жұптасып мен де көрейін,
Біраз бақытқа бөлейін.
Басқаны деп ем.
Болмады…
Екі жарты жан − бір бүтін,
Бола алмаймыз. Бұл − үкім.
…Қауқары жоқ күш қолдағы…
Сиқырлы сезім сырларын,
Ғашық жүректе мұң барын,
Жазбаймын деп ем.
Болмады.
(Келіп тұр екен толғағы)…
Жауапсыз махаббатым-ай!...