Ақын өлеңдері жинағы ✍️

Баса алмай алдыға бір адым (әл кеткен),
Таңылғам тұра алмай төсекке.
Сол күні... жан әкем… көз жасын көлдеткен...
Өрт тұрды өртеніп өзекте...
Қарап ем әкемнің көзіне үңіліп,
(Жастары жанындай мөп-мөлдір)
Ішінде өліп қап, өртеніп мың үміт
Күл болып кеткен-ді...
Үзілген мың үміт- қураған мың гүлдер.
Түстері қап-қара,
Ғұмыры бітіпті, жайқалмас (білдің бе?)
Сом дауыл – сом тағдыр таптаған....
Қорықтым...
Демеймін дәл бұлай мұңайдым

Жығылған үміттің жалауы.
Мен ұқтым: үміті сөнсе ер жылайды
Ал Әйел болмаса қалауы.
(Жалғанса үзілген үкілі үміті
Адамның көңілі жай табар!)
Алладан сұрағам жәрдемді күні-түн,
Аяққа тұрғызды қайтадан.
Аллаға шүкірлік!!! (Бағым бар бір елі).
Бұл күні жүрмін-ау дін- аман.
Әкемнің көз жасын еске алам үнемі
Жыласа бір адам...