Ақын өлеңдері жинағы ✍️

Беймәлім маған, қалқам, есімің де,
Кездестік емхананың есігінде.
Ауырып аласұрған біз ғана емес,
Аспан да, жер де сырқат осы күнде.
Сырқаттың белгілі ғой жайы қандай,
Күн қайда жарлы көңіл байығандай.
Тұрмай ма бізді қойып жалпақ әлем,
Дертінен дауасы жоқ айыға алмай.
Таң атса алтын нұрын өмір себер,
Әйтеуір келешекке көңіл сенер.
Пенденің қолынан түк келер емес,
Таппаса бір қисынын Тәңір шебер...