Ақын өлеңдері жинағы ✍️

Суретің қандай сүтті іңір,
Балтырлы қайың жұп-жұмыр.
Қасқайған қарағайлардың,
Сырғауыл бойы сыптығыр.
Атқандай мүлде жұмбақ таң,
Бақыттың қолын бұлғатқан.
Тағдырдың ғажап тартуы-ай,
Табиғат даусын тыңдатқан.
Айдынға құлап алып қыр,
Өзегін жусан жарып тұр.
Тамырсыз тастың бетінде,
Қып-қызыл қына жанып тұр.
Қиялым қыран құсқа ерсе,
Сағыныш одан да үстелсе.
Үлгірер ме едім жыр жазып?
Бүлдірген ағып түскенше.
Табиғат өзің табындыр,
Арнадым саған лағыл жыр.
Таңқурай тастап таңдайға,
Тамсанып тұрған шағым бұл!