Ақын өлеңдері жинағы ✍️

Тайып бір кетсем жолымнан,
Тұрасың көбің көлденең,
Оңымнан және солымнан
Атқылайсыңдар көзбенен.
Атқылайсыңдар сөзбенен,
Өлтіресіңдер даттаумен.
Даттаумен өлген кезде мен
Тірілтесіңдер мақтаумен.
Жаныма ерсе жамандық,
Кетеді өзі сенделіп.
Қорғайды мені адалдық,
Қорлаған кезде пенделік.
Жалп етіп сөніп жарық таң,
Жанары мүлде түк көрмей,
Сәуле мен мынау жарықтан
Сарылып үміт күткендей.
Ағарып шашы ананың,
Жанары мүлде түк көрмей,
Хабарсыз кеткен адамын
Бір ғұмыр бойы күткендей.
Жақсылық үшін сенделген
Жайым бар
Және алаңдар.
Үмітімді үзбей сендерден,
Жақсылық күтем, адамдар!