Ақын өлеңдері жинағы ✍️

Елес тіпті балалық,
Ертек тіпті,
Өзекті де еркелік өртеп бітті.
Әкелікті алдым да
Ұлдарыма
Қалдырдым мен баяғы тентектікті.
Оны қалай өзімше пайымдармын,
Оған қалай өзімді дайындармын.
Біраз көнбей жүрдім де бұғалыққа
Әке болу міндетін мойынға алдым.
Осыдан-ақ боларсың күйімді ұққан,
Кейде өтеді жанымнан құйын-бұлттар.
Бір кездерде алдына сені салған
Енді мені торып жүр қиындықтар.
Дегенменен бас қамын қуаламан,
Ақынмын ғой,
Жырыммен қуана алам.
Босағамнан қуамын тас лақтырып,
Сұр мысығын тірліктің сығалаған.