17.05.2022
107
Қайрау
Қайтады күннің қызуы,
Түседі қоңыр күз жерге.
Тарқаса дәурен қызығы
Оңайлау тимес біздерге.
Ыстығы менен жылуын
Жоғалтар балғын күндер де.
Тауысар балын, шырынын
Тәттісін берген тілдер де.
Жаныңның үрле шоқтарын
Жасыма сонда ешқашан.
Көзіңнің сонау оттарын
Сөндіріп егер тастасаң.
Кешіре алмаймын емге де
Ең әлсіз жанға теңгерем.
Және де қайтып ешқандай
Жылылық күтпе сен менен.