Ақын өлеңдері жинағы ✍️

Бәйге жиі болады ен далада,
Ат жарыссыз ен дала кең бола ма?
Демалыста көңілін көтереді
Ат спортын қызықтап ел қалада.
Дүбірлеткен жондардың барабанын,
Қандай рақат!
Аттарға қарағаның.
Ақ дауылды тұрғызып,
Қыр үстінде
Қуырады тұяқтар дала жанын.
Ыстық қан мен кеудеде жаны бар да.
Несібеден арғымақ қағылар ма.
Шабады ол көтеріп
Қырдың шаңын
Және соны қаптырып жабыларға.
Байлаулы аттың жанары жайнамайды,
Бұлшық еті бұлтылдап ойнамайды.
Ауыздығын қарш шайнап шаппаса егер
Ыстық қаны тұлпардың қайнамайды.
Қайда болсын алаулап жанады алаң,
Шабысынан шын жігер алады адам,
Бәйгетөбе немесе ипподром,
Арғымаққа бәрібір қала, далаң.
Тұяғынан атылып кесектер де,
Ат бақытын жарыспен есептеуге
Әдеттенген даланың дәстүрімен
Шапсын аттар самалға төсеп кеуде.