Ақын өлеңдері жинағы ✍️

Он сегізге толатын бір шағыңды,
О, ерке қыз,
Талай жігіт сағынды.
Саған біткен мінез бенен көрікті,
Қызықтасам дейтіндер де табылды.
Олар сенен қалмай қойды бір елі,
Олар сенің ізіңді аңдып жүреді.
Біледі олар сенің артық жағыңды,
Сенің әлсіз жағыңды да біледі.
Бір белгісіз сиқыр күштің бойыңда,
Булыға өсіп жүргендігі жайында.
Көп пенделер сөз қылады,
Ерке қыз,
Сенің әлі ештеңе жоқ ойыңда.
Жұрттың бәрі шырқап айта бастаған,
Өмір деген – керемет ән,
Асқақ ән.
Сол бір әнді қосыла айтсақ екен деп,
Көзін сүзіп жүрген жұрт та көп саған.
Екеу олар:
Бірін оның бірінен,
Айыру да қиын түсі -түрінен.
Біреулері сені мазақ етеді,
Біреулері ғашық саған шынымен.