Ақын өлеңдері жинағы ✍️

Қыздарды мен білемін,
Нәзігін де, гүлін де.
Олар жайлы жүрегім
Сөйлер өлең тілінде.
Қасиетті өлеңмен,
Жырламас ем сезінбей.
Нәзік олар, дегенмен
Нәзік емес өзіңдей.
Шуағы мол көңілге,
Күлкің сенің өтімді.
Сен мұңдансаң өмір де
Мұңданатын секілді.
Жүре алмаймын иілмей,
Көңілде көп із қалды.
Сүйемін мен сүюдей
Өзіңе ұқсас қыздарды.
Шынын айтсам тағы да,
Оларды біз аз ұқтық.
Сезем қыздың жанына
Жарасады нәзіктік.
Шабыт болып төгілмей
Дүниенің асылы.
Қайда жүрсің көрінбей
Өлеңімнің ғашығы.