Ақын өлеңдері жинағы ✍️

Кім түсінер қыз баланың арманын,
Өртенгенін,
Лаулағанын,
Жанғанын.
Мен өзімді тек өзіңе арнадым,
Көп жігіттен тек өзіңді таңдадым.
Көріндім бе мен өзіңе үміт боп?
Дала гүлін ұсынушы ең күліп кеп.
Сені момын деп кеміткім келмейтін,
Ойлаушы едім
Қыз мінезді жігіт деп.
Мен де сені,
Сен де мені ұнатып...
Сүйген едім,
Ықыласымды құлатып.
Көктем жырлап түкпірінде көңілдің,
Келе жатты жас махаббат гүл атып.
Жамылдық біз дала аспанын жақұт деп,
Санаспадық босқа кеткен уақытпен.
Бақыттымын деп сезінген өзіңнен
Мен, тегінде,
Әлдеқайда бақытты ем...