Ақын өлеңдері жинағы ✍️

Есіл ағады,
Есіл ағады,
Ақбұйра толқын жарды ұрып.
Есіл аққанда есіп ағады,
Жағада жартас жаңғырып.
Сырбазым сыңғыр,
Сыңғыр етеді,
Сұлулар таққан сырғадай.
Түрілген сонау түннің етегі —
Ұйқымды қайтсін ұрламай.
Есіл ағады,
Есіл ағады,
Мағжанның жүйрік жырындай.
Мені де бір қыз есіне алады
тарқатып өрген бұрымдай.
Есіл адағы,
Көсіле ағады,
Есіле ағады ерке өзен.
Көңілге мәңгі көшіп алады,
Аққудай арлы сол кезең.
Арнаңды көріп толтырған нұрдай,
Жаныңа келіп көсілдім.
Есілдің ерке толқындарындай
Ағып барады есіл күн…
Естінің толқын есіне алады,
Аймалап Ай, Күн жарық — құт.
Есіл ағады,
Есіл ағады,
Есіл ағады жарықтық…