Қызыл іңір. Қызылжар
Қызылжарда қызарды қызыл іңір,
көңілімнің ерітті мұзын іңір.
Әппақ-әппақ арманның аралында —
Ақдариға күндердің қызығы жүр.
Қызылжарда қызарды қызыл іңір...
Төбемізге төнгенде төстегі бұлт,
Көңілімде көгерді өшкен үміт.
Қызылымен есімде
Қызыуымен —
Қызылжарда ақ қайың кешкен ымырт.
Сапарларға сәт туса дайындалар,
күнім қалар көгімде
айым қалар.
Жастығымдай жап-жасыл желегімен
Әппақ-әппақ армандай қайыңды арал.
Қайғыны естен шығарып
уайымды естен,
Шал ақынның ауылы шайыр дескен.
Қызыл,
жасыл,
ақ түсті арман арал
Қызыл іңір,
Қызылжар.
Қайың кешкем.
Шоқ-шоқ қайың,
шоқ қайың,
топты қайың,
ақ самалын өлеңнің соқтырайын.
Ақ дүниеден адалдық іздегенде
Ақ қайыңдар,
сендерге кеп тұрайын.
Қызылжарда қызарды қызыл іңір,
Көңілімнің ерітті мұзын іңір.
Әппақ-әппақ арманның аралында —
Ақдариға күндердің қызығы жүр,
Қызылжарда қызарды қызыл іңір...