Жашап бил
Ак кар баскан карылыктын өлкөсүн,
Издебейсиң алды жактан кезигет.
Алтымыш жаш сепил болуп ортодо
Бөлүп турган чек арадай сезилет.
Ал чек ара кайтаруусуз калгандай,
Артка кайтпай ал тарапка өтмөй бар.
Ары уланып кетер болсо саякат
Ал өлкөдөн учуп гана кетмей бар.
Ал өлкөнүн аткан менен ак таңы,
Анда болбойт баштагыдай шаттануу.
Баш оодарсаң табышмактуу дүйнөгө
Бир тараптуу болот анын каттамы.
Алтымышка, жетимишке, сексенге,
Азап тартпай жетсең деле өйдөлөп...
Жарыя айтып той бергенче аларга
Жан сырыңды жашырганың өйдөрөөк.
Кайтпай калган жыл, айларды көп эстеп,
Кайгырарсың качанкыга, өткөнгө.
Ыйлаш керек боор ачытып мезгилге
Сүйүнсөң да токсонду ашып кеткенге.
Санаа тартып ашамын деп кай кырды,
Тактабай жүр, унуткаргын ай, жылды.
Жылдар менен жылыш керек чыйралып
Сенек кылбай өтүш үчүн тагдырды.
Асман качпайт ашыкпагын барарсың,
Алыс жолго чыгуучудай күйүнбө.
Түшсө түшөр маңдайыңа көп бырыш
Жүдөп бекер жылдызыңды түшүрбө.
Кетсе кетер кейиш жүктөп заманың,
Кирип, чыгып кийинкиге катар жүр.
Көп эместер көз ирмемге болсо да
Кийинкинин заманында жашай бил!