Ақын өлеңдері жинағы ✍️

Шалқақтап туыпты Ай бүгін,
Көрсетпей даланың байлығын.
Ағын ән салмайды сылдырап,
Жайықтың мұз басты айдынын.
Қасірет қатар кеп теңдікпен,
Өзен де жыр күтті ел күткен.
Күдікпен кеттің-ау, жан аға,
Қайратың ақталды ерлікпен.
Жабылған жаладан бастапқы
Жанарға тамбайтын жас қатты.
Ақбикеш коммунист болудан
Сол түні біржола бас тартты.
Мұз басып Жайықтың айдынын,
Дөңгелеп толысты Ай бүгін.
Еркіндік алдық біз бұл күнде
Орнына баяғы қайғының.