Ақын өлеңдері жинағы ✍️

Барлық ғасыр сөз еткен ақын жайлы,
Ақын жырын әр ғасыр мақұлдайды.
Бәлкім, сенің ғасырың өзі жырдай,
Бәлкім, менің өлеңім оқылмайды.
Уақыты жоқ қазір де асыққанның,
Жұмысы жоқ өлеңде жасықтардың.
Пәк сезімдей мөлдіреп алғаш жырым,
Оралады тіліне ғашықтардың.
Ол кезде де жалындап жанасыңдар,
Бал дәуренде сүю бар, жарасым бар.
Ол кезде де Ай нұры аялаған
Айнакөлге, екі жас, барасыңдар.
Құрбан болып іңкәрім жалыны үшін,
Орға жығар сөзімнің арыны шын.
Ол кезде де кереғар сыршыл әуен
Баяндайтын жүректің сағынышын.
Аққулардың сыр тыңдап қанатынан,
Өтерсіңдер далаға таратып ән.
Замандас боп сендерге жүрер, бәлкім,
Жырларым жүрегімнен жаратылған.