Ақын өлеңдері жинағы ✍️

Күні де ортақ әлемнің,
Өмір де ортақ көретін.
Әдеті бірақ бар елдің
Ұл, қыз деп бізді бөлетін.
Тәңірден адам қай дәуір
Қыз сұрап еді қашаннан?
Ұл болса болды, әйтеуір,
Аяғын алға баса алған.
Үйіңе солай, қыр қызы,
Трактор айдап әкелдің.
Болсын деп жарқын нұр жүзі
Ұлы жоқ асыл әкеңнің.
Қыз болып келдің өмірге,
Әке емес, елдің бағына.
Мәңгілік атың сенің де
Таспанбетқызы Жадыра.
Тындырмай бір іс керемет,
Аймаққа атың шықпаса.
Ұл болып туып не керек,
Туған жер қадір тұтпаса.