Ақын өлеңдері жинағы ✍️

Бұтағын шайқалтып дауылға,
Өрмелеп шыңдарға тасқұмар.
Қасқиып боранға, жауынға,
Тік қарап өседі жас шынар.
Бір сәтке ойы жоқ жасқанар,
Жалт ойнап, тұрса шың күркіреп,
Аймалау орнына ақ самал,
Тентек жел кетеді сілкілеп.
Мұздар да жылжыған асқардан
Өтеді бір кесек лақтырып.
Бұлақ та екпіні тас жарған
Бір соғып ағады шат күліп.
Ал шынар жадырап күлместен,
Күреспен өмірін кешеді.
Ол басқа мекенді сүйместен,
Қасқиып шыңға өрлеп өседі.