Ақын өлеңдері жинағы ✍️

«Кел, – дейді таудың самалы, –
Кешікпей алма бағына».
«Көр», – дейді маған даланы
Көктемнің қызғалдағы да.
«Кел», – дейді маған тас жарып,
Сарқырап аққан бұлақ та.
«Ер», – дейді маған ақша бұлт
Қыдырған сонау жырақта.
Таңда да, кеште әрқайда,
Түнде ауып, кейде батқанда Ай,
Дауыстар түрлі шалғайда
Шақырып мені жатқандай.
«Көр, – дейді, – бүгін жағаны», –
Толқыны ерке Жайықтың.
Жігіт те жымың қағады,
Ескегін нұсқап қайықтың.