Ақын өлеңдері жинағы ✍️

45-тің көктемі,
Дүние тегіс көктеді.
Тынған еді сұрапыл
Сұм соғыстың өкпегі.
Сорлы жесір жұбанды,
Сорлы жетім уанды.
“Жеңіс” деген жалғыз сөз
Шарлап кетті қиянды.
Соғыс салған зардаптан,
Жүрегіне қан қатқан.
Қайтты үйіне желкен ғып
Сағынышын солдаттар.
Сұрғылт тұман ашылды,
Сары дауыл басылды.
Соңғы тәтті Жеңіске
Шашу болып шашылды.
45-тің көктемі,
Оңайлықпен кеп пе еді?
Қасиетті бұл күнге
Біреу жетті, жетпеді...
Қалайтындар керісті,
Қалайтындар бөлісті,
Тар дейтіндер өрісті,
Ұмытпасын соғысты,
Ұмытпасын Жеңісті!