Ақын өлеңдері жинағы ✍️

Мұңаймашы, балақай,
Әкең сенің өлген жоқ.
Тек ол сенің ең алғаш
Адам болып қаз тұрып
Жүргеніңді көрген жоқ.
- Тірі, - дейді – көргендер,
Жүр, - дейді - әлі кердеңдеп.
- Ай сайынғы төлейтін
Мың теңгесін бергем, - деп.
Запыран боп кеудеңде
Қалды ма бір арманың?
Сені ол алғаш мектепке
Жетелеп те бармады.
Сарғайып қанша күтсең де
Сапардан әкең келмеді.
Саған ешбір дүкеннен
Ойыншық та ап бермеді.
Білем, білем, пәк көңіл
Жамандыққа сенбейді.
Әкең тірі, жамандар
Оңайлықпен өлмейді.
- Өлді, - дейді анашың,
Бірақ, оған сенбегін.
Әкең тірі,
Алайда
Оған ұқсай көрмегін,
Оған ұқсай көрмегін!