Ақын өлеңдері жинағы ✍️

Таң тереземнен қарайды,
Күн, күн не деген арайлы?
Бар әлем мені дәл бүгін
Ең бақытты адам деп санайды.
Мен бақыттымын расында,
Ең бақытты жан – ғашық жан!
Бір нәзік сезім сәулесі
Жүрегімнен шуақ боп шашылған.
Сол шуақтай шашылған,
Мен де саған асығам.
Соны бірақ сезбейсің,
Сезбейсің-ау, асыл жан!
Жүрегімді қуаныш
Жылытады, қымбатым!
Әлі менен тым алыс,
Әрі маған тым жақын...
Ай салтанатын құрса да,
Түн оны ұқсатар күміске...
Мен айдай толып тұрсам да,
Қыздың жолы, қыздың жолы жіңішке.
Жол жабық саған баратын,
Жоқ байлап ұшар қанатым
Бар тек осынау бір әнім
Сені аңсаған кездерімде салатын.
Әнім сыйлап қуаныш,
Жетелейді, қымбатым –
Саған, менен тым алыс
Әрі, әрі тым жақын.
Күн мойнына асылған,
Ақ шуақ боп шашылған,
Ақ бұлттардай үлбіреп
Мен өзіңе асығам!