Ақын өлеңдері жинағы ✍️

Күз келгенін бақтан байқа,
сары алтынмен апталған,
Тағы сабақ, телехабар, тағы сөздер...жатталған.
Тағы да үміт,
Тағы күліп...сізді сұрау ақ таңнан,
Жаным менің жапырақ боп көшелерде тапталған...
Таптап жатып, «асқан бақыт» тілеп едің әрқайсың...
Кім біледі, тағдыр алда тосады әлі қандай сын?
Түзілмеген жырың мен ем,
Күзіңменен арбайсың,
Алтын қала!
Жарқылдама, алдайсың ғой...алдайсың.
...Ішінде жүрмін сіріңке толы қораптың,
Үстінде тұрмын түйіскен тоғыз тораптың
Тағы да сөнді,
Тағы да сөнді жолақ Күн...
Бұл жолақ күнге мен бір-ақ сәттік қонақпын.
Қонақпын Сізге!
Қонақпын Күзге...
Сол-ақпын...