Ақын өлеңдері жинағы ✍️

Мен өмірден жалықтым ба, аяулым,
Өлім жетпей қамықтым ба, аяулым?
Обалсызбын, керегі жоқ аяудың,
Жалғыз атын зорықтырған жаяумын.
Кімге қажет жүген мынау зерленген,
Бауырың жоқ, бауырмалсып көргенмен.
Тірі емессің нәпақаңды тергенмен
Шыныңды айтшы - өзім бе, әлде, сен бе өлген?!
Тұрпайы бет, түр көрсетіп ұғынған,
Тоқмейілсіп қараушы еді бұрын да.
Сен қолқа да, мен тамыр ем жұлынған,
Біз екеуміз бірге өлгенбіз, шынында…