Ақын өлеңдері жинағы ✍️

Өте ме күндер осылай,
Қиялдың қуып елесін.
Түсімде көрген ақ кеме,
Жағаға қашан келесің.
Толқыған теңіз бетінде,
Шалқып бір ұшқан шағала.
Арманның аппақ кемесін,
Күтіп тұрмын жағада.
Ақ желкенін жел керген,
Кемелер кетіп барады.
Тоңдырды менің жанымды,
Теңіздің салқын самалы.
Көкжиегі көз жетпес,
Арманның алыс аралы.
Толқындар келіп соғады,
Жақпарлы жартас жағаны.