Ақын өлеңдері жинағы ✍️

Тірлігің мен ойыңнан қалжыратып,
Басып келер бойыңнан балбыратып.
Кетіп бара жатасың кешке қарай,
Мініп алып ұйқының тарғыл атын.
Құшағында бар тірлік ұмытылып,
Түс көресің әртүрлі, құмы-қуыт.
Айды аралап, жұлдызды тамашалап,
Ертегіден қашасың жыны қуып.
Ұйқы деген – тәттісі тірлігіңнің,
Түйінделсе, сәттісі бір күніңнің.
Құшағында келеді жата бергің,
Түрілмеген астында түңдігіңнің.
Осы сәтті күдікті айдан-анық,
Жаулар кетіп жүріпті пайдаланып.
Еріккеннен бабалар шығармапты,
«Ұйқы – дұшпан» дегенді айдан алып.