Ақын өлеңдері жинағы ✍️

Талай тағдыр ойран боп,
Талай ғасыр қайран боп,
Жайраған дүние-ай.
Тыңдағанды мұңайтып,
Тарихынан сыр айтып,
Сайраған дүние-ай.
Естіп баба тынысын,
Талай оғлан қылышын
Қайраған дүние-ай.
Қара жерді шайқаған,
Мың өшіп, мың қайтадан
Жайнаған дүние-ай.
Тұяғы бүтін тұлпарсыз,
Қанаты бүтін сұңқарсыз
Бірі кем дүние-ай.
Жоғыңа айтып салауат,
Барыңа жасап қанағат,
Жүрген дүние-ай.
Аюменен алысып,
Күшікпенен күресіп,
Үрген дүние-ай.
Өзі жатып жығылып,
Сүрінгенді сын қылып,
Күлген дүние-ай.
Заманға қарай адамы,
Түлкіден жаман арамы.
Болған дүние-ай.
Бауырлар ұмтып ұятты,
Мейірім беріш сияқты,
Толған дүние-ай.
Өзіңді не деп сөгейін,
Кәрімді қалай төгейін,
Жалған дүние-ай.
Төзбестің кебін киеміз,
Сонда да сені сүйеміз.
Арман дүние-ай.