Ақын өлеңдері жинағы ✍️

«Баяғыдай күн құйындап өтпейді,
Баяғыдай Күн де шуақ төкпейді.
Қоңырсалқын, ызғырықты болса да
Тіршілікте уақыт шіркін жетпейді.
Баяғыдай қызық емес жиын-той,
Баяғыдай мазаламас миыңды ой.
Бұйғы өмірмен тұйықталып жүрсең де,
Көңіліңнің тыншымауы қиын ғой.
Иә, көңіл көкдөнендей желеді,
Сыр бермейді, әлі жас боп келеді.
Қайрат қайтып, тұсаулы аттай болсаң да,
Көкірегің сайрап, қиял өреді.
Көңілімнің үзілмейді талабы,
Жүрегімде үміт оты жанады,
«Шатақшалды» қартайыпты демеңдер,
Келіссеңдер тағы тоқал алады»,-
Деп әзілдеп атам сырын ақтарды.
Әжеміздің көзі шалға оқталды.
Қарттың сыры ұнап кетіп жарыма,
«Жігіт болып» бір сапарға баптанды...