Ақын өлеңдері жинағы ✍️

Мамыр еді, мамыражай түн еді,
Көкек даусы тыныш кешті тіледі.
«Меніменен қарлығаш та келді»,- деп
Қуаныштан жарылады жүрегі.
Қасиетті құс келді деп ту алып,
Хабарлайды байғұс көкек қуанып.
«Қарлығашы адамдардың келді,- деп
Қанатымен құтқаратын су алып.
Ертесіне таңғы араймен таласып,
Қос қарлығаш үйді айналып жарасып
Ұшып жүрді, сағынышын сездіріп,
Біз де тұрдық көзайым боп қарасып.
Ит арқасы қияндардан жол алды,
Қарлығаштар мекеніне оралды.
Адамдардың қарындасы – қарлығаш
Бір заманда топырақтан жаралды.
Есігінің маңдайына ұялап,
Балапанын бала біткен аялап
Қарлығаштар өсіп-өніп жүреді
Адамдардың маңайында саялап.
Айырқұйрық, ақ тамақты киелім,
Сайрайды кеп көкке созып иегін.
Оқ жыланнан қорғап қалған баланы
Қарлығашты Ана біткен сүйеді.