Ақын өлеңдері жинағы ✍️

Әрең біліп мекеніңнің дерегін,
Қалыңдықтай желбіреткен желегін,
Қуаныштан құстай ұшып келемін.
Сен тұратын сол қаладан, жарығым
Сездім бірден жүрегіңнің жалынын,
Тіпті басқан іздеріңді таныдым.
Мамырдағы күн нұрына тап келіп,
Сағыныштан тұлабойым жатты еріп.
Сен жұтатын ауа қандай тәтті еді!
Сен тұратын қала гүлмен құлпырып,
Тау басынан бұлақтары бұлқынып,
Ағып жатты өзің жаққа ұмтылып.
Сол таудағы аққайыңдай иілген,
Сол бұлақтай мөлдіреген күйімде,
Саған жеттім салтанат боп үйіңе.
Отауыңа отырғызсаң өзің біл,
Отбасының махаббатын сезіндір.
Менің саған сөз айта алмас кезім бұл!