Ақын өлеңдері жинағы ✍️

442 ай,
13260 күннен бері біргеміз!
Өзімізше, тас қамалдай іргеміз.
Кітаптарың – ұрпақтарға мұрамыз,
Менің жырым – үлдеміз бен бүлдеміз.
13260 күн мен түн,
Екі жарты боп келеміз бір бүтін.
Үй болған соң сылдырлайды ыдыс та,
Күтпейді екен әркез алдан нұрлы күн.
Сен тарпаңдау,
Мен еркелеу болғанмен
Бір жан болдық, екеуге ортақ арманмен.
Бір жан болдық, екеуге ортақ жүрекпен
Жағаласып, жалған десе жалғанмен.
Үй болған соң,
Кейде жетіп, жетпейді.
Көңіліміз күнде шуақ төкпейді.
Өміріміз бірде – ілгері, бірде – жәй,
Тамырымыз жылдан-жылға көктейді.
Әрбір күнге,
Әрбір жылға қуанып,
Маңайыңды мейірімге суарып,
Кенжетаймен шаңырақта отырмыз
Төрт баланы төрт отау ғып шығарып