Ақын өлеңдері жинағы ✍️

Сен де адасып,
Мен де адасып жүр едік,
Тағдыр жайлы талас туса іредік.
Қияндағы бір бақытқа қол жетпей,
Қиялдағы бір өмірді тіледік.
Сен де жарты,
Мен де жарты жүр едік,
Қу тірліктен тарамыстай сірі едік.
Жалқылықтан безердей боп жүдедік,
Жартымыздың табылуын тіледік.
Мен өзіңді,
Өзің мені көрдік те,
Ғашық болдық сезімге ерік бердік те.
Көз көрмейтін бір тартылыс күшімен,
Орналастық екеуміз бір ендікке.
Мен өзіңе,
Өзің маған тартылып,
Жүректердің отына ыстық шарпылып,
Уық қадап, шаңырақты көтердік,
Мойнымызға әулет жүгі артылып.