Ақын өлеңдері жинағы ✍️

Біздер мінген алып кеме,
Көкті жарып келеді.
Бұлт керуені қалып төмен,
Көңілге жыр өреді.
Әппақ бұлттар ақ күмістей,
Шағылып көз арбайды.
Қанаттанып, толқып іштей,
Сырды жырға жалғаймын.
Бұлттан асып, көңілім тасып,
Жырдың жайдым желкенін.
Ақ бұлттармен араласып,
Жайды өлеңім өркенін.
Қандай ғажап, ақ бұлттардың
Үстінде ұшып, жырлаған
Шабытымның шаттықтарын
Жаным сезіп нұрланам.
Ақ бұлттармен арайланып,
Ұшақ іші кеткендей.
Жыр көңілдің сарайлары
Зеңгір көкке жеткендей.