Өмеке, сіз жүрген жер құт-береке
Өмеке!
Өмірің – бек, атыңыздай.
Тегінде би бар арғы затыңызда.
Дегдар жан парасатпен сөйлегенде,
Халқыңыз бағынады хақыңызға.
Бойыңыз граниттен құйылғандай,
Ойыңыз сан ғасырды шиырғандай.
Адамға берілер бар қасиетті
Жаратқан сізге ғана бұйырғандай.
Ағатай!
Билік айтып ел ішінде,
Жүресіз келтіріп бір келісімге.
Манастың тойын жасап қырғыздарға,
Кеңітіп алғаның бар өрісіңді.
Тарихтың тереңіне сүңгіп жүріп,
Көмбесін ақтардыңыз үңгіп жүріп,
Таптыңыз Елібайды еңіреген,
Қытайда жерін аңсап мың жыл бұрын.
Таң елі пір тұтатын ірі ақынын,
«Түркі!»,- деп,
жаны жырдан тұратынын
Дәлелдеп шыққаныңыз асыл аға,
Ұлтыңның алғаныңыз рахымын.
Жамбылды әкім болып жайнаттыңыз,
Жастарға жігер беріп, қайраттыңыз.
Сенатта Спикер боп заң шығарып,
Қазанын Парламенттің қайнаттыңыз.
Сіз жүрген жерге Өмекем, құт қонады,
Сіз айтқан сөз халыққа құп болады.
Сіз келіп бата берген шаңырақтың,
Ырысы бағыменен жұп болады.
Мейір мен махаббаттан жаратылып,
Зерде мен зеректікпен дара тұрып
Ағатай, өнеге боп отырыңыз
Әділеттің айырып қара қылын.