Ақын өлеңдері жинағы ✍️

Қайың тұр қырда,
Көз тартып жасыл желекпен.
Әппақ балтырын еркелей келіп жел өпкен.
Жапырақтары мың жүрек болып желбіреп,
Күш-қуат алып Жер-ана берген қоректен.
Қайың тұр қырда,
Бойжеткен қыздай бұралып,
Қабығын аршып, сырғасы әсем, сыланып.
Бүршіктері мен бұтақтарымен тыныстап,
Көктегі күннің сәулелерінен нұр алып.
Қайың тұр қырда,
Келіншектейін сызылып,
Арбалып қалып, сымбатына әсем қызығып.
Жасыл желекті жастық шағыңды еске алып,
Қараймыз оған көңліміз кейде бұзылып...