Ақын өлеңдері жинағы ✍️

Бақыт боп қонсаң басыма,
тау болсаң да көтерем.
Даңғыл жол болсаң таусылмас,,
бойыңда қаңғып өтер ем.
Өрт-жалын болсаң өршіген,
кетсем де жанып құшар ем.
Кең жазық болсаң,
төсіңнен
сағымың болып ұшар ем.
Болар ма сірә жеңгенің,
еркімді алдың еңсеріп.
Өзенім болсаң сен менің,
өсер ем бойлап теңселіп.
Шығысым болсаң сен менің,
таң болып сенде атар ем.
Батысым болсаң сен менің,
күн болып барып батар ем.
Қиын-ау енді сенбегім,
күнәң да болса, өсекке.
Ауруым болсаң сен менің,
жатар ем тартып төсекте.
Сен құдай болсаң, пендеңмін,
не десең де, көнер ем.
Ажалым болсаң сен менің
қарсыласпай өлер ем.