Ақын өлеңдері жинағы ✍️

Бірде биік,
бірде асқар боп көңілім,
Жетісуда өтті-ау барлық өмірім.
Мұқағали секілденіп
еңіретпесем де елді мен,
бір кісідей батар менің өлімім.
Бір басынан замандардың өткізген не дауылын,
кеткен жырақ бауырым деп, бауырым,
Түркістаны,
Қожахметі қосылып,
жылап тұрар алыстағы ауылым.
Қалып артта жарық әлем мүлде кең,
тар қапасқа тығылармын түнге тең.
Жұп-жұмсақ боп,
мәңгілікке мәпелеп,
жамбасыма тиер мынау гүл мекен.
Жап-жас кезде іздеп келсем қиырдан,
маңдайыма осы бір жер бұйырған.
Сондықтан да,
көрмей қалсам бес-он күн,
жүрегім бар Жетісу деп жиі ұрған...