Ақын өлеңдері жинағы ✍️

Күтірлетіп белдеуді
Күнде тұлпар жыр тарпып,
Күмбір-күмбір кеудеден
Күбір-күбір сыр тартып.
Құпиялы жыр – сезім
Құйылатын шақ қандай.
Бір сөзіңнен бір сөзің
Асып түсіп жатқандай!
Жүгіресің шапқылап,
Естіртуге даусыңды.
Судың бәрі – ақ бұлақ,
Шудың бәрі – ән сынды.
Жан көрінбей көзіне
Ой ойлайсың не түрлі.
Қыздың бәрі өзіңе
Құмартатын секілді.
Өртесе өлең өзекті
Өзіңдікі – бұл ғалам.
Өлеңің бар газетті
Оқитындай күллі адам.
Таңғалмасқа таң қалдық,
Көз сүзбеске көз сүздік.
Бұл не деген аңғалдық,
Бұл не деген ессіздік!
...Биік ұстап еңсені
Тасымасқа тасатын,
Сағындым-ау мен сені,
Жайраңдаған жас ақын!