Ақын өлеңдері жинағы ✍️

60-ыма қалыпты бір жарым ай,
Алпыс жылда қойдым-ау бір жарымай.
Әркімнен сұрап алған не болады
Жарылқай салмаған соң мырза құдай.
Не болады емініп сұрап алған,
Таршылық жолды тосып тұрады алдан.
Өлеңнің өрті ішіне түскендерге
Кедейшілік – Қасымнан мұра қалған.
Шүлен де бірде тисе, бірде тимей,
Малданып мырзалардың құрметіне кей,
Малтығып мал табам деп жүрмін әлі
Қысқа жіп қолды қиып, күрметілмей.
Не екенін жоқшылықтың ерте біліп
Келемін шолақ атты мен тебініп.
Көңілімді көтерген қайран Өлең,
Ең болмаса, тұрсаңшы сен төгіліп!