Ақын өлеңдері жинағы ✍️

Біреулер кейде Сізге жүр тиісіп,
Тиіссе, қалады жұрт үрпиісіп.
Әлемді мойындатқан Әбдіжәміл –
Елінде жәй әншейін – Нұрпейісов.
Нұрпейісов болса егер жүздің бірі
Санаймыз шіркін сонда біз кімді ірі?
Арал дейтін әлем бар.
Сол әлемнің
Әбеке, емеспісіз Сіз кіндігі.
Талантты табанға сап таптағалы
Жолыңда құрулы көп қақпан әлі.
Өшіріп тастағысы келеді олар
Еламан, Тәңірберген, Ақбаланы!
Көңіл деген әрі – алмас, әрі – шыны,
Кеткен жоқ сырлы аяқтың әлі сыны.
Алғы шепте келеді Әбең әлі –
Солдаттың етігіндей жаны сірі!
Түйедей таңдап жеген кіл ащыны,
Әбеңнің мәңгілікке ұласса үні
Маңқиып маң-маң басып жүре берсін
Киелі қара сөздің классигі!