Райымбек батыр
Қонған екен қапысыз адаспай бақ,
Тау тұлғаңмен болыпсың алашқа айбат,
Хангелдінің тастүлек немересі
Тұла бойға тұндырған намыс-қайрат!
Жан емес ең қан аңсап, жау сағынған,
Күй төгіліп тұратын саусағыңнан,
Батыр болдың қалмақты бауша қырған,
Дұшпаныңнан кезің жоқ тау шағылған.
Болсын дедің қазақтың еркін елі
Сенің күйін әлі асқақ шертіледі.
Туған жерді құрметтеп жайнамаздай,
Қас дұшпанға бастырмау сертің еді!
Сертке берік ерлердің, антына адал
Дақ түсірмей өткен соң даңқына дәл
Өлерменге айналды өзгелері,
Қаһарманға айналды халқы
қамал!
Ақ найзалы,
Нар қылыш,
Көк сүңгілі
Намыс
сың ба найзағай?!
Кексің бе ұлы?!
Нөпір жылдар көпірдей қалтылдаса
Аңыз болып кетеді көп шындығы.
Арманынан алаштың туды ма аңыз,
Есіміңді елдікке ту қыламыз.
Алматыдай абат
-бақ қала болды
Дөң басында қалдырған дулығаңыз.
Жаратқан соң бізді де ерқара ғып,
Ұрпағыңбыз деп сенің арқаланып,
Тірлік кешіп жатырмыз Алматыда
Зиратыңды жатсынбай ортаға алып.
Шықпасақ та қару ап жорықтарға
Сыйынамыз рухыңа торыққанда
Басыңа кеп тілейміз тарыққанда,
Қасыңа кеп түнейміз қорыққанда!
Қамыққанда арқаға ызғар батып,
Ұлдар ұрпақ сұрайды,
Қыздар бақыт.
Қанша шапан жамылдық өзің үшін,
Қанша басты мұжыдық сізге арнатып!!
Аңыздардан айнымай жеткен белгі,
Қаусырасың даңқыңмен көк пен жерді.
Қиындықтың өзені қақ жарылып,
Райымбек!десем
-ақ өткел берді!
Тастамадың дала мен тауды иесіз,
Тастамадың тобырды тәрбиесіз.
Бейбіт күнде батырдың бағасы жоқ,
Қиын екен күн кешу әулиесіз!
Айбар болып алты алаш тудың елге,
Қалып қоймай гүлді бел,
нулы белде
шұбырынды жасамай жазғандарды
Қандай бақыт
Жатқаның шулы жерде!
Айналмай-ақ тас құдай,
жез көсемге
мақсат-мұрат бар еді өзге сенде;
Жаңғыртамыз атыңды жүз тілде біз
Ерсі-қарсы сабылып өз көшеңде!
Дей алмаймыз шүйлігіп жауға шаптық,
Өндіре алмай жүреміз дауласақ түк.
Ағаш таппай қалам мен қауға саптық
Біріміз кеп басында аят оқып,
Тіріміз кеп жасаймыз сауда-саттық.
Әулиесің, батырсың шын бағалы,
Үш жүзге де келерсің,
мыңға да әлі.
Хантәңірі жұртыңның қан тамыры,
Керек бізге мұртыңның сынбағаны!
Ұрпақ өсіп келеді ұрандаған,
Солар сенің сақтайды мұраңды аман,
Бар қазақтың бір жерге басын қосқан
Саған иман тілейміз бір Алладан!