Ақын өлеңдері жинағы ✍️

Құлы емеспін байлықтың да, бардың да,
Қызықтырмас жақұт тастар, алтын да.
Асқақ болып көрінгенмен арманым...
Қауқарсызбын
Ұлы сезім алдында!
Гүлі емеспін қырдың, дала, таудың да,
Ұлпасы емен жаңа жауған қардың да.
Биіктікке бойлағанмен көңілім...
Дәрменсізбін
Ұлы сезім алдында!
Кей сәттері қамалсам да тар мұңға,
Сырымды айтып ел алдына бардым ба?
Құлашымды кеңге жайып жүргенмен...
Әлсіздеумін
Ұлы сезім алдында!
Дәмін таттым ащының да, балдың да,
Қанатымды сәл күйдіріп алдым ба?
Босағадан төрге мені сүйреген...
Бас иемін
Ұлы сезім алдында!
Ұлы сезім! Ортақ жасқа, балғынға,
Махаббат та, шапағат та бар мұнда!
Сынбас едім сынағына өмірдің,
Садағамын Ұлы сезім алдында!