Ақын өлеңдері жинағы ✍️

Арманды жүрекке тұмар ғып,
Бойда бар қаламға құмарлық,
Алматым,
ҚазГУ-ім,
өзіңе
Келген ек
Құштарлық шын артып.
Қайырмасы:
Қарсы алдың
құшағың айқара,
Көк-жасыл орманың жайқала.
Көңілдің құстары сайрайды,
Керемет дүние айнала,
Жастықтың жалыны қайда да!
Күн кештік осындай гүл-бақта,
Таң қалып тамаша сымбатқа.
Шіркін-ай, терген ек ең алғаш
Алманы Таудағы Гигантта.
Қайырмасы:
Жүрсек те ауылдан жырақта,
Жасып бір көрмедік бірақта.
Жаны үйлес курстас достар-ай,
Жаны ұқсас мөп-мөлдір бұлаққа,
Жанымыз шомылды шуаққа!
Студент шақтар-ай аңызды,
Ойласақ көзден жас ағызды.
Өмірмен күресте шыңдады
Алатау – атамыз тәрізді.
Қайырмасы:
Қарызбыз жеткенше ғұмыр-дем,
Ұстаздар, ұлағат сіңірген.
Шалқысын шабыттың шырқауы,
О, достар, жанарға мұң ілмең,
Күлімдең, күлімдең, күлімдең.
Бел буып ел мен жер қамы үшін,
Бермелік азамат намысын.
Ана тіл, атасалт, ар үшін,
Танытып тұлпардың шабысын.
Қайырмасы:
Әр істе шығалық топ жарып,
Аман-сау, шаттанып, бақ дарып,
Ел артқан үмітті ақталық.
Ұлтының тұлғасы атанған-
Министр Мұхтармен мақтанып!