Ақын өлеңдері жинағы ✍️

Зуылдап өтті жаз, қыс, көктем, күз де,
Опынар мен емеспін өткен іске.
Жас күнде не көрсең де қызық сынды,
Ұқсайды бір мезетте көрген түске.
Жанымда жан серігім, елік жанар,
Өмірге, тіршілікке мейір қанар...
«Жалында» қызмет еттім, баспагер боп,
Таусылмас жыры да оның ұзынсонар...
Жан жарым оқып жүрді АГМИ-де,
(Дәрігер керек дер ем әрбір үйге).
Кеш болса күнде той мен күнде думан,
Кешеміз жастық дәурен жалын күйде.
Жайым жоқ қиындықтан қиналарға,
Босайды кей күндері винолар да...
Дем алып рухани біз жүреміз,
Театр,кітапхана, киноларда...